القصة كاملة
بلاعيم
إكتشفت إن مراتي بتعمل اسحار واعمال بالصدفة بعد 6 سنين جواز !! وانها ياما كانت سبب في أذية ناس ، وتعب ناس ، وخراب بيوت ملوش اول ولا آخر . مش مستوعب ازاي مكتشفتش ده من زمان ، كنت بصدقها لما بلاقي زيارات ستات ليها كتير وبتقول صحابي وبيحبوني ، كنت بسكت وبقول ما انا بسيبها طول الوقت لوحدها وحقها يبقي عندها اصحاب ! كان البيت دايما ريحته زفرة ولا كنت أسألها كانت الاجابة دايما ان دي ريحة السلم وبتظهر لاني بكون داخل من بره وبعد شوية بتروح !!
او تقول ان ده اكل القطط اللي هي بتربيها كنت بستغرب من الكمية ! والاغرب ليه كلهم لونهم اسود ؟! وكنت ارجع واقول ان دي حريتها والمهم انها مبسوطة .. كنت مغيب عن ان كل ده مستخدم في الشر اللي كانت بتعمله .. انا مش عارف ايه القرار الصح اللي ممكن اخده .. ابلغ عنها وافضحها ولا اطلقها بالمعروف وساعتها مش هبقي عارف لسه مستمرة في اذية الناس ولا لا..؟!
ولقتها عرفت اني عرفت حقيقتها دخلت عليا الاوضة وقالت :
قرارك اللي هتاخده مش هيمنعني عن حاجة .. قبل ماانسي خاف ع نفسك قبل متاخد قرار
وسابتني ومشيت !!
حسيت بجردل تلج وقع فوق دماغي .. وادركت ان مش بعيد تموتني ، الموضوع مش هيفرق معاها كتير، ولا حتي عارف اجمع افكاري ممكن اتصرف ازاي ؟!
شريط معرفتي بيها مر قدامي عيني وبدأت افتكر كل الحاجات اللي كانت بتحصل بتدل ع افعالها وكنت مغيب عنها..
بدأت احكي لنفسي الحكاية من الاول عشان اقدر ارتب افكاري ..
اكتشافي لامرها وقذارة افعالها جت لما بدأت اشم مع ريحة الزفارة ريحة عفن من المطبخ .. نضفنا مرة واتنين وتلاتة والريحة مكنتش بتروح ابدا كانت بتزيد ، كانت الريحة بشعة كانها قبر .. او قبر فعلا !
بدأت ادور عشان اعرف الريحة دي جاية منين لحد ملقيت تجويف صغير ورا ضهر المطبخ ، تجويف كده معرفش اللي عمله دماغه بتفكر ازاي لدرجة ان لولا الريحة دي مكنتش اكتشفته ابدا ويارتني ما اكتشفته !؟
ده قبر للقطط !! اول ما فتحته كبقتش قادر اطيق الريحة فضلت اكح وبطتي قلبت وكنت بطلع في الروح ، جمعت قوايا وبدأت افتش وابص كويس
لقيته جثث للقطط ! في منها سليم ومنها المتحلل ومنها اللي معدته انفجرت والعفن بياكلها !!!
وكان مع كل جثة قطة ورقة ملفوفة او ملزوقة في القطة او حروف محفورة ع جسم القطط !!
مبقتش مستوعب المنظر المرعب اللي انا شايفه قدامي !!
جبتي جوانتي المطبخ وبدأت امد ايدي اشوف ايه مكتوب ع الورق واخد القطط دي في كيس كبير وادفنها في مكان بعيد .. وانضف كل ده ..
الريحة لا تطاق لكن ما باليد حيلة ، لازم اسيطر ع نفسي …
حطيت كمامة وبدأت الم الجثث في كيس واخدت الورق اللي كان ملزوق عليهم وبدأت اقراه :
س ل غ ف ساطع ملفوق مربون . مجمع عابر
ده كان مكتوب ع اول ورقة قرتها !! سطر واحد فيه الكلام العجيب ده
فتحت ورقة تانية وكان مكتوب فيها :
ربط .حجب.انعدام.رغبة.المرض .
وفيها رسمة لكائن ما ، مقدرتش افهم اللي راسم كان فعلا قاصد المشهد ده ولا كان مجرد نقش؟!
وكان متعلق فيها قفل !!
مقدرتش افهم فجمعت كل الورق واحتفظت بيه واخدت جثث القطط ودفنتها في مكان بعيد ولما رجعت البيت كملت تنضيف وبدأت الريحة تروح
مراتي مكنتش في البيت كانت بايته عند اهلها يومين..
فاتصلت بيها وقولتلها اللي حصل لقتها مرة واحدة بتقولي :
بلاعيم انشق ..
قولتلها مش فاهم حاجة؟!
قفلت في وشي ! حاولت اتصل تاني الخط اتفتح وكان صوت تقطيع في الشبكة وفجأة لقتها ورايا !
رميت الموبايل وفضلت خايف ! احساس مرعب وغريب مسكني اول ما لقتها في وشي !!
معرفش جت امتي وازاي؟!
ومن غير ما تديني اي مساحة لسؤال او كلام قالت :
فين الورق اللي انت اخدته ؟ ودفنت فين الجثث ؟!
معرفتش ارد لانها كملت وقالت :
انت خربت كل حاجة ، وجريت ع المطبخ !
مش عارف اعمل ايه ! لقيت نفسي بدخل الاوضة ورميت نفسي ع الكرسي وانا بقول لنفسي :
الست اللي أمنتها ع بيتي وع نفسي بتعمل اعمال للناس وسحر !؟ الكلام اللي كان في الورق طلاسم سحر !؟
مش عارف اعمل ايه او اتصرف ازاي وكل اللي جه في بالي
فكرة واحدة اني ابلغ عنها .. لكن الفكرة قابلها رجوع عنها لما مرة واحدة لقتها دخلت عليا الاوضة وهي عنيها كلها شر !! لايمكن تكون نظرتها نظرة حد بشري !
شفت في عنيها شيطان !! شفتها جن مش انسان !
وقالت:
قرارك اللي هتاخده مش هيمنعني عن حاجة .. قبل ماانسي خاف ع نفسك قبل متاخد قرار .
وسابتني ومشيت !!
اختفت من البيت في لحظة ! واتأكدت انها فعلا مش موجودة بس اللي مش متأكد منه انها ياترى هتظهر تاني في اي لحظة ولا لا ؟
وايه اللي ممكن اخده معاها؟
والسؤال الاهم ايه اللي كانت بتعمله؟!
اسئلة كتير لازم تترتب عشان افكار الاجابة عنها والتصرف فيها تكون صح
والاهم معرفة اللي هي كانت بتعمله عشان اقدر افهم
في وسط كل ده سمعت صوت قطة بتصرخ كأنها بتطلب حد ينقذها جريت في اتجاه الصوت لقيت واحد واقف في الصالة ماسك القطة ودابحها والدم مغرق كل ملامحه وهدومه !!
وخرج من باب الشقة وهو مقفول !!
فجأة الدنيا ضلمت والنور قطع ! مش شايف حتى كف ايدي من العتمة ولا عارف اتحرك واروح فين ؟!
بدأت اسمع صوت همس وضحكة ميزتها بسرعة انها ضحكت طفل وبدأ نور ضعيف يظهر خارج من المطبخ وصوت ضحكة الطفل بتقرب وبتوضح اكتر ولقيته مرة واحدة ظهر وخرج من المطبخ والنور متسلط عليه بدأ يمشي في اتجاهي ومعرفش ان كان شايفني وقاصدني ولا لا ؟
بدأ يقرب وبدأت تظهر هيئته قدامي بملامحه البريئة وضحكته اللي بتدل ع انه بيلعب وكل ما بيقرب كل ما الضحكة صوتها بيكون بشع وكل ما ملامحه بتوضح قدامي وهيئته المرعب بتبان !!
واختفي مرة واحدة وحسيت بنفسه في ضهري !!
اترعبت والتفت مرة واحدة لقيته اعمى !! عنيه مفيهاش النني الاسود اللي عندنا !
وماسك في ايده قطة وبشدة واحدة فصل راسها عن جسمها !! وشرب الدم محستش بعدها بحاجة غير لما فتحت عيني ع شروق الشمس . لقيت نفسي في مكان غريب مرمي ع الارض ، ودماغي تقيلة جدا كأني حد ضربني عليها بشومة .. وعنيا مزغللة والرؤية مش واضحة . حاولت اجمع نفسي واركز اكتر عشان اقدر اقوم ، ولما وقفت لقيت نفسي في المقابر !!!!!
واقف جوه دايرة لونها احمر وقط اسود واقف خارج الدايرة ولما شافني فوقت مشي بخطوات غريبة كأنه كان واقف حارس عليا وراح يبلغ حد !!!
انا مش عارف اللي بقوله ده خطرفة ولا انا اتجننت ولا ايه مسمى ده تحديدا ؟!
وايه حجم الكارثة اللي انا بقيت فيها ؟
و بدأت اتحرك وبدأت الدنيا تضلم والرؤية تقل . بدأت اسرع خطواتي واجري لاحظت من بعيد بوابة كبيرة بتبدأ تقفل ، ادركت ان لازم اجري بأقصي سرعة عندي واخرج ، لاني معرفش ايه ممكن يحصلي لو اتحبست هنا !؟
وانا بجري لاحظت ان كل شواهد القبور مكتوب عليها بالدم ” بلاعيم” كل مكان مكتوب عليه بلاعيم انا مش عارف ده ايه بالظبط وحسيت انه ضلال ليا اني مخرجش ، ركزت اكتر وفضلت اجري ..والبوابة كانت يادوب بتقفل لقتني خرجت وواقف ع باب شقتي !!!!
صوت سمر مراتي فوقني وهي بتقول:
مكنش لازم تكتشف السر ، اديك اضطرتني اضحي بيك ، لان بلاعيم أمر بموتك .
معرفش ليه لقتني بقولها انا موافق ع حكمه برغم اني معرفش هو مين ؟ بس عايز اعرف كل حاجة ، احكيلي لاني اللي محتاج افهمه واعرفه ازاي انتي كنتي كده وانا مقدرتش اكتشف ده ؟ ازاي قدرتي تضحكي عليا السنين دي؟
وبدأت سمر تتكلم :
كان ليا واحدة صاحبتي هي اللي علمتني ، كنت برفض في الاول كل محاولات اقناعها اني اساعدها في االي هي بتعمله بس لما شفتك اول مرة في الشغل اتشديت لك ، مرة ورا التانية بقيت بتمناك وانت عمرك ملاحظتني ولا خدت بالك مني ، حاولت الفت انتباهك الف مرة وانت ولا هنا ، مكنش قدامي الا اني اطلب مساعدتها انها تخليك تشوفني بأي طريقة ولقيت نفسي بتجر للسكة دي ، كأني مغيبة !
ووافقت وساعدتها وعلمتني وفات شهرين واتقدمتلي وسنة واتجوزنا .. وخلال كل ده انا اتعلمت وحبيت السكة دي وبدأت ابقي مميزة عنها كمان ، وصلت لمرحلة في التحضير اقوى منها بمراحل لدرجة ان هي كانت دايما بتحكي لي عن ملك الجن اللي معاها وهو بلاعيم لكن هي تخاف كن حضوره ، انا حضرته …
وده اداني مكانة في العشيرة بالمساعدة الاولى عنده حتي جن العشيرة كانوا مش في المكانة دي ، لكن اديني بدفع التمن ان نهايتك تبقي ع ايدي !!
مع مرور الوقت كنت بعمل اعمال كتير وبساعد ستات كتير متجوزتش تتجوز من اي راجل قريب منها تختاره ، كانت البداية قصدي خير لحد ما جت ست وطلبت عمل ان واحدة متتجوزش ، رفضت وامتنعت لكن هو وافق ، كنت فاكره اني قوية بالمكانه اللي وصلتلها لكن كنت غلطانة ، هو في مكان قوة تاني خالص ..
هددني بيك فوافقت وكانت بداية سكة جديدة للشر
الطفل اللي انت شوفته ده كان سحر اسود ع دم قطة ان الطفل ده يموت
مكنش ليه ذنب بس اللي كانت طالبة ده ست مبتخلفش وجوزها اتجوز عليها وهي اكتشفت ده وهو عنده طفل 7 سنين وقررت تنتقم
كان لازم اوامر بلاعيم تتنفذ مهما كانت وتحت أي ظرف كان ومهما كانت الضحية ..
دم القطط مادة خام لأي سحر، مفعولة مضمون ، مع مرور الوقت وتنفيذ كل الطلبات بلاعيم كان عايزني اكون ليه وانا رفضت ده ومنعت نفسي عنه ..
وعدني انه هيجبرني ع حاجة من اتنين :
موتك او اني اخضع ليه
الايام مرت وانا اجبرت ع الاختيار
هو اللي عمل مقبرة القطط ، وهو اللي دخلك دايرة المقابر ، واتعمد ان البوابة متقفلش ، هو سهل عليه يحبسك ، بس هو عايز ينتقم مني انا
دلوقتي انت فهمت مين بلاعيم
وايه كان مخليك معمي ومغمض انك تشوف اعمالي السيئه او حتي تشك فيا ، احنا قدام النهاية .
وفجأة ملقتهاش قدامي !!!!
بدأت الحيطان تنشع دم ، والصالة كلها أصبحت بالون الاحمر ! وبدأت تظهر كتابات ع الحوائط ورسومات ونقوش غريبة ..
وصوت اطفال بتبكي وفي نفس الوقت اطفال بتضحك ، وجثث القطط بتخرج من كل حيطة مفصول راسها عن جسمها ، الدم سال في المكان كله وبدأ منسوبه يعلي ويعلي وبدأ يغطي جسمي كله وكأني بغرق !، ومفيش في ايدي اي حاجة اعملها ولا قادر حتي اقاوم اللي بيحصل !!!
كان لسه فيا حيل ان اركز وجه في بالي اني اقول الطلاسم اللي كانت ع الورق اللي لقيه متعلق مع جثث القطط ، لقيت نفسي فاكره وبردده :
س ل غ ف ساطع ملفوق مربون . مجمع .عابر
فضلت اردد الطلسم ده بالذات معرفش ليه وكل مقول الطلسم اتبعه بقول فليحضر بلاعيم ، فضلت اردد الطلسم واقول وراه فليحضر بلاعيم لحد ما غرقت جوه بحر الدم وبدأت افقد تحكمي في نفسي ومش باقي الا ثواني ع النهاية !!!
فجأة المنسوب بدأ يقل ويادوب بدأت اخد نفسي وشهقت وبصقت الدم من بوقي ومناخيري ، مكنتش مصدق اني لسه ع قيد الحياة وان لسه في العمر بقية …
منسوب الدم قل لحد ما المكان اصبح خالي من الدم تماما واختفت معاه جثث القطط ولقيت فجأة شئ ابشع من الدم بمراحل واقف قصادي !!!!
جسد احمر ملتهب عملاق ، ليه رأسين في كل واحدة منها عين واحدة سودا ومفيهاش البياض اللي في عنيا !! وليه قرون تشبه قرون الكباش الجبلية وأرجل مجوفة زي وحوش افلام الفانتازيا الأجنبية !!
اتسمرت مكاني وانا مذهول ومرعوب من الموقف والمشهد اللي انا شايفه !! جسمي بيتنفض والعرق مغرقني ودرجة حرارة المكان اصبحت جهنم بمعني الكلمة !!
وفجأة بدأ يقرب في اتجاهي !! برغم ان المسافة بين وبينه خطوات الا اني حسيت انها سنين !!
بيتحرك ببطئ شديد ومع كل خطوة الموت بيقرب مني اكتر واكتر ، اتحرك لحد ما وصل لي وغمضت عنيا في استقبال الموت !!!
غمضت عنيا لثواني ولدقايق يمكن ! ومفيش اي حاجة حصلت !! سكون تام وهدوء يخوف اكتر ..
فتحت عيني ببطئ ولقيت سمر في وشي !! وقالت :
انا مقدرش أذيك ، انه ياخدني احسن من اني اشوفك مأذي بسببي ، انا منعته عنك في اللحظة الأخيرة ، دي غلطتي وانا اللي لازم ادفع تمنها ، وانا قررت اني اعيش في عالمهم وابقي ملكه ولا ان يصيبك شر ..سامحني …
لقتني بقولها لا احنا هنتغلب عليه ، هنهزمه لان احنا اقوي ، مهما بلغت قوتهم فهما مستمدنها من الشر واحنا اقوى بالخير دايما .. صفي نيتك وقلبك وقولي انك هترجعي عن السكة دي وهنستغل قوتك في اللي وصلتي ليه في السحر اننا نعمل ردع لشر عشيرة بلاعيم ، الخير اقوي ياسمر وانا مهما كان مش هسمح اشوفك مش كويسة او يصيبك شر ، فكري وشوفي ممكن نخلص منه ازاي وانا هساعدك ..
دخلت جابت كتاب صفحاته صفرا وتحس انه قديم لدرجة ان الورق متاكل من العته ..
وقالتلي :
عشان نخلص منه هنحتاج حاجات وطلبات غريبة ، عشان نغلب الشر هنحتاج الشر ، او الحاجات والطلبات اللي بنستخدمها في اسحار الشر ..
رديت بالموافقة وقولتلها اطلبي وانا هجبلك كل حاجة ..
وبدأت تطلب حاجات عجيبة منها :
حلة او إناء متسخ ! دم مش نضيف ! بول طفل !! وشعر كلب ولبن !؟؟؟ وشوية عطارة عجيبة !!!
قولتها عندنا وقت قد ايه نقدر نحضر كل ده ؟!
قالت : بحسابتنا يوم ونهار وبحساباتهم ساعة يبقي ساعة قدامنا ساعة …
جريت ومن حسن الحظ ان فيه عطار كبير قريب مننا جبت كل الحاجة اللي كتبتهالي ، ولما رجعت لقتها محضرة كل الباقي بس مكنتش موجودة !!!
وسيبالي ورقة مكتوب فيها كل اللي مطلوب يتعمل والطلاسم اللي مفروض اقراها وفي نهاية الورقة :
سامحني بس مينفعش انا اللي اعمل ده لازم حد الشر ملهوش مكان جواه يعمله ، حد لسه نضيف مش قذر زيي .. سامحني ..
عملت المطلوب زي ما كانت سمر كاتبة ، حطيت كل المطلوب داخل الحلة ومزجتهم مع بعض وحطيت الحلة ع نار بدرجة عالية جدا .. كل ده اخد ساعة الا ربع وبعدها بدأت اسمع اصوات مرعبة !! وصرخات ناس بتموت حرفيا كأن وحش بيهاجمهم وبيفترسهم وبدأت خيالات تظهر قدامي كأنه فيلم سينما لألف مشهد ورا بعض ناس بتموت وناس بتجري وناس بتقتل بعض !!!
ربع ساعة فاتت وكأنها الف سنة ! وانا بتفرج ع بانوراما شر كاملة ، ومش عارف ايه هيحصل بعد كده ؟ ياتري دي نهاية بلاعيم ، ولا نهايتي انا ؟!!
الامور رجعت لطبيعتها جدا والحلة نشفت والنار اطفت . بدأت اقرب ببطئ ناحية الحلة ولقيت جواها مكتوب ” تم الأسر” مفهمتش الكلمة الا لما بصيت ورايا ولقيت سمر واقعة ع الأرض !!
جريت بسرعة عليها وكانت بتجيب دم حرفيا من كل مكان من جسمها !!
بدأت ارفعها واقولها مالك ؟!
سمر : انت نجحت لانك نضيف من جواك ، وانا حاولت اعمل حاجة صح حتي لو كانت دي نهايتي ، واعتقد ان دي نهايتي اللي استحقها ، انا مكنش ينفع اشوفك مش بخير او تموت قدامي وانا ساكتة ومتكتفة ومش قادرة انقذك ، النهاية دايما بتكون انعكاس لكل البداية ، النهاية هي نتايج البدايات ..
سمر ؟؟! ردي عليا ؟ متسبنيش ؟ فوقي ارجوكي فوقي …
اتصلت بسرعة بالاسعاف
واخدتها ع المستشفي وانا معاها ودخلت العناية وبعدها بساعتين كان الدكتور بيبلغني بأن سمر ماتت !!
مكنتش مستوعب الخبر ؟! ولا قادر اصدقة !!
انهارت ودخلت في حالة عصبية ونفسية كبيرة دامت لشهور وانعزلت عن كل العالم في مصحة نفسية !
وبعد ما اتعافيت من التعب النفسي رجعت البيت ومش قادر استوعب ان سمر مبقتش موجودة واني خلاص مبقتش هشوفها تاني !!!
برغم كل اللي حصل ، عمر ما حبها هيقل في قلبي ابدا …
